Hoerkind: Die memoires van ‘n randeier

Van die begin van sy lewe af, het Herman Lategan se lewe wipplank gery tussen die koestering van geliefdes en verwerping. Hoe vreeslik moet dit wees, nie soseer om gediagnoseer te word as bipolêr nie, maar jou hele lewe, verhoudings en ervarings word ook gekenmerk deur hierdie uiterstes. Hierdie sensitiewe, brose mens is blootgestel aan uiterste verwerping en emosionele mishandeling. Tog onthou hy dat sy ma Ria baie liefdevol was teenoor hom as jong kind. Sy het ook nie patriargie en die politiek van die dag aangehang nie

Op ʼn manier was die jong Ria die mens wat ek graag wou wees toe ek jonk was, maar met die wysheid van nabetragting dankbaar is ek is nié.

Hierdie boek is vir almal wat met deernis kan kyk na die randfigure, maar ook vir dié wat nie die moed het om hulle eie oortuigings uit te leef nie, maar tog deur ander se onversadigbare lus vir lewe, kuns en kultuur wil meelewe. Jy proe die Franse sjampanje, kaviaar en krap, maar jy ruik ook die morsige hole by die dokke en voel hoe hard ʼn parkbank slaap..