Droomboom
Ratings1
Average rating4
Soms is huis aan die ander kant van die wêreld... Wanneer sy skrywersverblyf in Killaloe, ’n klein Ierse dorpie, aangebied word, gryp professor Mariaan de Jongh die geleentheid aan. Só kan sy Suid-Afrika en die trauma van die studenteopstande agterlaat. Sy kan fokus op haar vertaling van die tesis oor Afrikamites en -legendes en vergeet van die geweld en haar kollega se dood. Ierland, met sy magiese landskap, legendes en kleindorpse rustigheid, oorrompel haar. Sy maak nuwe vriende en begin selfs ’n tentatiewe verhouding met Declan. Wanneer sy egter uitvind dat hy bande met die Ierse Republikeinse Leër het, besef sy dat geweld en gevaar oral aanwesig is. Droomboom is ’n verhaal van vergifnis en aanvaarding, en die helende krag van vriendskap en liefde.
Tags
Genre
Reviews
Popular Reviews
Reviews with the most likes.
Ons loop saam met Mariaan deJongh deur die magiese landskap van die dorpies Killaloe en Ballina, waar sy uitkyk op ʼn meer terwyl sy besig is met die vertaling van Afrika-mites en legendes, as deel van ʼn skrywersverblyf. Sy moet nog ʼn traumatiese gebeurtenis tydens die studente-opstande in Suid-Afrika verwerk. Sy ontmoet vir Declan O'Brien, sy suster Lisbeth en maak vriende met die passievolle Darcy en Catriona, wat verlang na haar man.
Die leser word ʼn kykie gegee in die lewens van gewone mense in Ierland, hulle gelowe en bygelowe. Dwarsdeur die verhaal word Ierse mites en legendes uit ander eeue steeds deur mense geag en beoefen. Deur haar verhouding met Declan en die veearts Humphrey, sien ons hoe familiebande ly onder verbintenisse met die Katolieke kerk en die Ierse Republikeinse Leër, hoe families uitmekaargeskeur word daardeur.
Vir Mariaan word die rol van water in haar lewe wat vroeg in die boek vir haar voorspel word, tydens ʼn reddingspoging duidelik. Sy kry haar vlerke in die water en maak gereed om as ʼn nuwe getransformeerde self die lewe aan te pak.
Lesers van Irma Joubert en Bets Smith se boeke sal ongetwyfeld aanklank vind by Marie Spruyt se werk.