In Memoriam

¿Novela hestórica con gays? Sign me up for it! El conceptu por sí solu enganchóme, pero la execución brillante terminó de ganame por completo. “Contraste” sería una bona definición pa esta novela, xuega con ello constantemente.
Entama con Sidney Ellwood y Henry Gaunt na so escuela, mozos y felices. Reciten poesía de Tennyson y citen autores griegos. Una vida idílica (lo idílica que pueda ser nuna escuela masculina en 1913 enllena d'adolescentes hormonaos y completamente faltosos).

Al llegar la guerra Gaunt ye'l primeru n'alistase a cuenta la so ascendencia alemana. Metíense con él y llamábenlu “espía alemán”, vióse forzáu a ello, a non sólo ver como mataben a los sos collacios, sinón tamién a matar a los sos compatriotes. Equí entra ún de los temes principales: la idealización y mitificación de la guerra. Píntase como dalgo glorioso, dalgo a lo que cualquier home xoven debía aspirar a participar. Non obstante, dempués llega l'horror de la realidá: ver les muertes más grotesques imaxinables, la calidá de vida miserable nes trincheres, la escasez de comida, los bombardeos y proyectiles y, probablemente lo más duro, ver morrer a tolos tos collacios con apenes dieciocho y diecinueve años.

Fala de cómo la guerra roba l'inocencia y la xuventú, de cómo te camuda como persona y te destruye. Onde más se refleza esto ye nel personaxe d'Ellwood. Yera astutu, pícaru y encantaor. Siempre tenía una respuesta pa tou. Enllenu de vida y carisma. Tres tolo polo que pasó, torna una persona despegá, agresiva ya impredicible. Trata amás del amor con estrés post-traumáticu.

Saco, o quiero sacar, una conclusión antibelicista d'esta maraviyosa novela. Sólo destruye. Los civiles nun importamos un res, por muncho qu'haiga convenciones internacionales o crímenes de guerra y escontra la humanidá. Sólo somos peones a la mercé de los intereses capitalistes ya imperialistes de los poderosos.

Obviamente, la homosexualidá (go lesbian!) ye un tema central. El tratu que recibe recuérdame al de l'antigua Grecia, onde se vía como un ritu de crecimientu, dalgo propio de la mocedá que nun debe trespasar a la vida adulta, pues eso yá sería viciu y perversión. Nel colexu d'Ellwood y Gaunt yera una especia de xuegu del que podíen esfrutar mentanto esperaben pa casase con una bona muyer y formar una familia nuclear con xardín con llendes de maera blanco.

Por embargu, la visión dientro la guerra nun ye la mesma. Nun ambiente hípermasculinu, les muestres de ciñu ente homes nun taben mal vistes. Nun teníen que demostrar la so virilidá constantemente.

En resume, una hestoria con xiros y vueltes, personaxes complicaos con desendolcu y una narración tanto crúa como delicá. Nun puedo recomendalu lo suficiente.

“And it was a magical thing, to love someone so much; it was a feeling so strange and slippery, like a sheath of fabric cut from the sky.”



“-Ich möchte leben”

“-Ich auch”